自由行

重新出發!!

2011-04-20T21:17:00.001+08:00

哀傷過後, 要努力向前啊!!
要努力搵錢錢錢、玩玩玩同食食食~~~

恭喜發財!!

2011-02-03T01:04:00.001+08:00

祝各位blog友, 身體健康, 心想事成!!

恭~喜~發~財~!!

黑仔皇

2011-01-27T23:15:00.001+08:00

拋柴的部位再一拋柴, 要趕功課既時侯, 連電腦都壞埋, 有無咁黑呀???

希望d衰氣唔好再纏住我!!

2010-12-31T23:43:00.002+08:00

祝各位blog 友新年快樂! ^^
不過我唔多快樂, 因為我今朝"咬柴"...妖!!

我都做得到!

2010-03-01T23:11:00.004+08:00

2010年2月28日第一次參加渣兜十公里賽事, 可以順行完成, 感覺超爽呀!
原來意志堅定, 好多事都可以做到!
另祝3位仍在醫院的跑手早日康復!!!

p.s. 我用左一個鐘頭廿三分零七秒完成!

2010 新年快樂!!

2009-12-30T21:44:00.003+08:00

我雖然沒有更新blog, 但係我一得閒都會到各位blog友處坐坐,

祝各位2010 新年快樂!!

回應 the8 的問題

2009-11-27T17:17:00.005+08:00

在the8 "十九幾次想唔撈"中講到"你估我走先定你走先?"既問題, 其實我諗左2日, 因為....我諗緊讀唔讀degree(一年貨仔, 2010年1月開課), 好處係可以安心讀書/做功課(已問前人要睇好多書做project),但係心理上知道要加刑確實難頂, 仲有...我仲未抖夠.
如果1月唔讀, 要等到7月先再開班, 中間既半年又好似好浪費(雖然已有構思進修英語), 而家係腦交戰, r 頭呀!

相機

2009-11-24T14:36:00.003+08:00

賒借(相機)唔係辦法, 我想真係要出手呀!!!!!!!! 大家有無好推介????

我既目標:

Nikon - P6000 (Denzel 介紹)
Nikon - D60 (見過d相幾靚)
Canon - G10

希望聖誕節前買到呀!!!!

近況

2009-11-21T11:17:00.002+08:00

小休幾天回來, 公司暫時仍可上網, 櫃桶被爆了 (外星人話要取鎖匙開櫃取printer ink, 最後發現printer ink 在無鎖的櫃內), 又要做週年檢討 (照肺), 我懷著"最後一次"既心情來迎接, 希望願望成真! 我唔想再對住呢班怪獸呀!!!

為自由(上網)倒數

2009-11-02T15:53:00.001+08:00

今日收到通知, 由15號起公司的電腦再上唔到所有網站, 唉...我既自由時間開始倒數呀!!!

顛佬正傳

2009-08-31T11:02:00.003+08:00

昨日是學生暑假的最後一個星期日, 加上自由心情麻麻, 所以決定帶姪女去玩.
當自由獨自一人乘地鐵時, 就發生了一件"顛佬正傳"事件.
事情由自由入車廂開始, 當時列車不太多人, 我站在車廂內, 當時有一男一女(唔識)扶在同一枝扶手上, 自由亦扶上時, 男既突然鬆手, 雙手橫抱, 當時列車仍未開出, 男既突然除下背包, 從我後面走出, 用背包打我背後, 然後站在我前面. 雙眼通紅, 抽下抽下指著我說:" 你講呀! 你講乜野?" 接著男既行去門邊站, 在我身後有幾個女仔站著, 其中一個和我有眼神接觸, 大家都知發生乜事. 自由唔知係咪嚇親, 一d反應都無仍然站著, 只是雙眼望實顛佬, 怕他再一次"黎料"

唉...自由時常都遇上一些奇事. 說實話, 政府時常呼籲要接納精神病患者, 唔係唔想接納, 只係我地真係唔知幾時得罪佢地, 令佢地病發. 而家最擔心係我會唔會成為youtube 女主角??

惡夢成真

2009-08-28T11:53:00.002+08:00

因為天王唔do 既關係, 我都估到亞sir 遲早一日會將肥婆"升呢", 今日收到一張買制服order, 一看...肥婆買新制服 (full set), 我心知不妙, 再check...係 senior既制服, 已經有答案, 亞sir 決定將佢升呢.
其實升唔升係遲早問題, 我都預o左. 不過以我識亞sir 既為人, 要經佢 "升呢"唔係易事, 唔係要出草裙舞, 佢都唔會出手. 估唔到佢今次毫不手軟, 我想係時勢做英雄, 萬一肥婆唔do, 個場邊個睇呀? 唔通佢自己睇番呀? 俾我係亞sir 都唔會呀!

以後既日子, 真係要小心, 唔通我出年要去打小人????

腦輕鬆

2009-08-27T14:20:00.003+08:00

test 完之後, 一腦鬆晒!! 爽呀!!

所以今日點都要抖下, 抖下既定義係唔做功課, 只做無謂野.

無謂既定義...係今晚學整口水雞和椒鹽白飯魚,

一想到以後想食四川食物, 唔駛山長水遠北上止痕, 就心花放!!

如果有得學整川北涼粉、涼拌土豆絲就更好呀!

o 晒咀

2009-08-18T17:33:00.003+08:00

因為天王走既關係, 亞sir呢排不停約人見工, 我個腦海就不停出現呢句「一樣米養百樣人」.....

尋日來見工者係一個83年出生男生, 有degree, 做過幾份工(每份工大約年多), 加一身俗到暈既古龍水

自由: 麻煩你填左份form 先, 另外麻煩你將工作及學歷證明給我影印....

見工男: 哦!! (一個file 給我, 只有學歷, 一張工作證明都沒有)

約20分鐘後....

自由: 請問你填完form 未??

見工男: um.....呢3張form 你地請左我先填呀!!! (呢3張究竟係乜野form 呢??)

開估: 破產狀況聲明書、利益申報表、入職前體格檢查

自由最後逐張問亞83男有無, 之後叫佢劃左佢+簽名(好似教仔做功課)
唔怪得而家d後生仔成日搵唔到工呀!!!

碎碎唸~

2009-08-14T11:07:00.004+08:00

尋日應妹妹要求, 和她去美食博覽, 場館比往年闊落好多, 起碼每攤檔賣的東東我都看到, 我和妹妹仲...食左好多野添 :)

不過行完好累.....

***************

呢排沉迷整果醬,
想整mix 既果醬,
唔知幾時玩厭唔整呢????

**************

上星期日晨早游水, 爽呀!!
游一轉25就無氣再游, 如果係沙灘, 睇怕我都上左頭版呀!

**************

呢排勁追24 同心計, 好耐未試過追電視劇呀!

**************

今日睇番FM d note, 終於開x (唔識寫添:p) , 希望合格呀!

**************

今晚又去小肥牛gathering, 我好掛住d牛背肉!! yummy yummy!!

等收工發呆既自由

多謝你o地!!

2009-08-01T10:29:00.005+08:00

多謝 hana 同 Lau Long 送我的小禮物, 多謝!

彊糖味道不太甜, 還分成小包包裝, 方便在公司工作時(偷)食呀!!

呢盒藥泉xxx, 有北海道、山形 <另有2個地方唔記得左 :) > 攪到我好想去日本浸番轉.
最鬼馬係塊花花鏡, 一見到呢塊鏡, 我就想起你! 花形做得好靚, 我好喜歡!!

再一次多謝你地呀....!! ^^

Home made 果醬

2009-07-29T12:46:00.011+08:00

呢期好喜歡睇烹飪 blog, 遇到有興趣又簡單既食譜, 都會照辦煮碗整一次. 我有個習慣, 係會參考多個食譜, 如果製法步驟雷同, 就會開工.

呢個士多啤梨果醬, 係我第一個實驗品, 味道酸酸甜甜, 幾好味, 最正係甜度可以自已控制, 又可以整自己喜歡的味道, 最最重要係健康d, 有興趣既都整番樽食下呀!

小試牛刀, 都叫成功!!

打開樽蓋, 除左有好多果肉, 仲好香添

除左搽面包, 淋在雲呢拿雪糕都應該好味

參考食譜: chi's chi's kitchen
http://hk.myblog.yahoo.com/chichi-kitchen/index?l=f&id=13

天王唔do!

2009-07-27T16:40:00.007+08:00

今日亞sir 正式向我宣佈, 天王唔撈呀! 其實我無乜太大感覺, 我同佢連兩句都無, 所以我只"哦"左一聲! (自由好cool~~~)
天王平時收工, 明明無野做, 都賴死做戲唔走, 做完年中既"工作表現評核"當日, 佢....既然六點就走, 個樣仲好"生意失敗"..唔通亞sir 丙得佢好勁?? 自由又幾時可以走呢???

************************************************************
又話香港失業率高, 自由眼見好多時係"有工無人做", 今日又有好例子:

亞sir: 自由你幫我約呢3個人見工!
自由: 無問題! 你幾時有時間見呀??
亞sir: 盡快....然後係一堆日期/時間

***********************************************************
自由: 唔該x小姐
x小姐: 我係
自由: 你好! 我係xx公司, 想約x小姐見工......(唔駛問, 約見工梗係辦工時間內)
x小姐: um...辦工時間唔係咁方便, 可唔可以揀放工後? (亞sir 同自由都要收工, 睬你都傻)
自由: 唔好意思, 放工後唔會, 同埋經理其它時間都有出site, 未必就到...
你返緊工? (呢句其實有d多如)
(唔好傻呀! 而家係你見工, 要人家就你, 唔係卦??)
x小姐: 係呀!
自由: um...不如約你星期三早上11:00呀! 你有一日時間可以請假......(擺明暗示你請假又好, 詐死又好, 有晒時間俾係諗)
x小姐: um....我要考慮o下, 我明天覆你幾點見工??
(咁既態度俾我就唔會請!!!!! 真係食"蒙"佢, 邊個莊邊個閒都未分得開, 吹脹!!)

後記: x小姐到6點都無覆我. 最攪笑係亞sir 話"自由你都可以主動打電話去問..."
心諗, 唔係要咁cheap呀? 如果咁做, x小姐實不可一世. 有時都唔明d高層諗乜肯野!!

30-6-2009 沙巴第八日

2009-07-21T10:21:00.014+08:00

今日起床後, 又去樓下既食我至愛早餐...冬蔭公+桔仔冰, 之後就出發去機場了. check in 時真係好驚行李超重, 好在係13.9kg ^^. (max. 15kg) 之後就去買虎蝦, 我揀左size:L 6-8, 盛惠MH$68, pack 好後就係咁既樣...

一個手提o急咁自家製雲吞蝦面

入閘後又要去另一個check point, 買雪條, 雪條有好多味道, 榴槤、粟米、大樹菠蘿、芒果、香芋、紅豆, 如果大家下唔到決定, 可以買盒mix 試下. 每盒MH$18

自由買左2盒, 榴槤+mix (potong 大昌都有, 做乜拎餐死呢??)

搭 air asia 就好似搭巴士咁, 我眼見架機落完客, 轉個頭我地就上機, 仲要一上完機, 點夠數, 3, 2, 1 就飛呀! 效率快得驚人呀!! (比原定早左15分鐘)

機場侯機室

返屋企呀!!

返到深圳, 自由隻腳好似裝左摩打咁, 因為雪條唔捱得幾耐呀!!

咁就完成左8日沙巴之旅, 多謝各位耐心俾面收看!!

29-6-2009 沙巴第七日

2009-07-20T15:54:00.041+08:00

今日既行程係去神山公園遊, 8:00am 準時出發, 今次司機係識廣東話既人, 好lu..有野講呀!!

另外仲有2個老外+2個台灣女仕+ 一對印度夫婦(渡蜜月), 上齊人後向神山出發.

其實好多人去神山都只係去公園行下. 攻頂真係好少架!!

在車內影既神山, "神山我又黎呀!"

第一個景點, 神山市集, 好多神山土產賣, 你估下有乜??

好甜既菠蘿~~唔知係咪好出名, 果然有菠蘿地標!

d菜都好新鮮

仲有蜜糖賣! <但係無榴槤:( >

當然唔小得既手工藝品

從觀景台影神山.....又係好大霧

無聊作

之後又向山上出發~~去到公園, 買過票後, 就開始呀! 嘩..撞鬼..我好似去左種植物公園咁, 在公園行一個圈, 介紹下d植物.

好得意既花~~ (唔好問我佢係叫乜名, 聽唔明呀!! hehe~~)

都係o個句, 唔知花名, 不過佢話味道似blue berry, 食得架.

行完公園, 向山腳出發食lunch. lunch 係食中式, 有粟米湯、黑椒牛柳、旦炒飯(賣飛佛), 味道唔錯!! (可惜無影相)食飽飽, 行過對面就係溫泉. 講真同山腰比, 真係熱好多. 聽司機叔叔講, 山腳既溫度比山腰熱好多, 所以行完山如果想抖一抖(住一晚)先走, 千祈唔好揀住溫泉, 會好熱架!!

自由自拍照, 呢對涼鞋(印)跟足我2個禮拜

因為吊橋都在溫泉內, 導遊姐姐帶我地行左吊橋先, 之後有一小時浸溫泉

老實講, 自由好驚會破壞公物, 踩爛左好瘀架喎!!

其實會有管理員望住同告示講明, "每次只限2人同時行橋, 最多容納6人", 加上每部相機都要賣票, 款項作為維修吊橋用途, 真又好假又好, 買左票, 咁就算踩爛, 良心都好過d o麻!!

行完橋係浸溫泉時間, 自由其實好愛浸溫泉, 不過...呢個除外. 因為....

一早收左風似洗腳水, 再加上有朋友浸完皮膚敏感, 自由又點會犧牲呀!! 所以呢個鐘係無無聊咁呆等!!

咁鬼熱, 整枝粟米雪條嘆下先! 盛惠MH$1.00

味道呢....都ok呀!! hk$2.24 想點呀!

有熱水區, 亦都有凍水區, 你睇小朋友玩得幾開心. 自由坐左o係個亭度等, 同亭既仲有一個馬來家庭來游水, 可能見我一個人, 佢地仲問我試唔試小食, 真係好nice呀!

其實佢地個bb好得意, 自由仲同bb玩左一陣, 不過臨走時唔記得同bb影相添!!

返到kk, 因為今晚係kk最後一晚, 一支公又唔知食乜., 最後自由決定將好食既再"重溫"一次. 入圍既包括:

馬來咖哩, 其實自由想"番兜"海鮮喇沙就真, 可惜....佢今日off, 唯有整個簿餅+桔仔冰!

之後魔鬼又黎呀! 今次係榴槤旦糕, 講真一個人食真係好滯, 身上又唔多夠錢(實情係唔想換太多馬幣) 但又好好味...點好呢???

最終自由都係不敵, 雙腳向住榴槤旦糕進發.

嘆完之後, 好有罪惡感呀!! 之後去換多小小錢, 又去左超級市場敗家. 然後再去整多碗檳城蝦面先罷休.

貪食既結局係......又飽又滯!! 之後返去執野明天返香港lu!!

28-6-2009 沙巴第六日

2009-07-18T11:14:00.031+08:00

今日k就要返香港, 一早起身同亞k食埋早餐後, 7:30am 送她上的士後, 我就準備行sunday market,

sunday market 只在星期日開, 11點前要出發, 因為11點已經開始收檔, 要行就要趁早呀!! 我覺得似一個街市似d, 有食品、日用品、謢膚品 (無錯係謢膚品, 因為佢向自由sell美白)....、寵物、植物包萬有, 我都覺得幾得意.

sunday market 入口

因為早既關係, 遊客不太多

擺設品都有.

有榴槤、山竹植物賣. 不過就算帶到返香港, 都種唔到 (檔主話)

d芒果好大個呀!!

sunday market 既戰利品 (買得好少呀!)

kk市最舊的酒店, (價錢唔平啊!)

之後沿海旁行去菲律賓市場, 好曬呀!!

藍天與白雲, i like it!!

water front 地標

菲律賓市場附近既海味街, 其實都平架, 不過自由唔識揀, 又唔識煮, 所以齋行無買. 之後行o下行o下, 又行到去按摩店....隻腳不受控制咁入左去. 我係第一個客, happy hour MH$40/hour....今次無次上位姐姐按得咁好呀!!

之後返仲去左食k讚口不絕既喇沙店食lunch, 味道ok, 不過未至於讚不絕口.

又係桔仔冰, 究竟我總共飲左幾多杯呢?

有蝦有雞絲, 湯底唔夠辣! 不過以MH$4.5價錢, 我絕對接受.

之後返rest house 洗個白白, 又等出發去紅樹林+睇螢火虫. locul tour 遲到, 由1:00pm 等到1:45pm 終於出發呀!! 搭左2個鐘車後...就到呀!

呢隻monkey, 其實香港大把, 不過"猴離鄉貴", 成班港燦博命影, 咁我都唔執輸影一張咁多呀!

之後食個下午茶(個團包), 就上船呀! 船上面有4個香港人, 一對澳門夫婦, 一對老外, 我地一船人就浩浩蕩蕩咁出發. 講真, 長鼻猴真係睇得唔清, 不過總算有出現過. 原來長鼻猴係一夫多妻制, 一棵樹成家坐晒響棵樹度, 都唔知係佢望我定我望佢, 望下望下, 點解有d係大鼻(好似成龍, o個刻好想俾霸王佢)有d尖鼻(似老外)? 原來大鼻係雄性, 尖鼻係雌性, 所以外傳成龍咸濕唔係無根據架.

出發呀!!!

sorry....手震!!

日落

之後回程食個dinner, 然後再上船睇螢光虫, 因為太黑呀, 所以影唔到! 不過成棵樹都閃下閃下, 我又諗起"再見螢光虫"!! 好明顯趕收工, 睇完一棵樹(10分鐘)就bye bye 啊! 之後乘車返歸.

,10點幾返到, jenny 第一句"你去左邊呀? 咁夜先返?" (好亞媽口吻) 自由: 無呀! 岩岩落車咪返黎!

jenny: 我以為你一個人去到咁夜.....

o個刻真係有d感動架! 萍水相逢都咁關心...

27-6-2009 沙巴第五日

2009-07-15T14:32:00.008+08:00

原本k對激流無興趣 (因為她在尼泊爾玩過), 因為自由未玩過既一所以k捱義氣陪我玩. 自由一向想玩3-4星激流(先坐車, 再轉火車, 到達起點先玩1-1/2小時, lunch後再玩45分鐘, 上岸轉大船再搭車返歸) 但k講明"我唔可以跌落水", 老板娘 jenny 游說k 玩這條河, 攪到成11點先成功....

可惜...第2日早上, jenny 一早回來對我們說 full booking 呀! 只有九如河(1-2星, 車程個零鐘)有位, 咁....好過無呀!

我們被安排和一對香港情侶一組, 再加一個職員, 他仲帶埋仔仔一齊開工, 玩左個零鐘, 嘩...悶到呢! 我覺得自己似扒艇多過激流. 所以好多人都"自動"跳入水中涼快o下, 自由都想跳架, 不過眼見同船既情侶跳船後, 上黎都好呢hea, 要幫手拉上黎, 自由自己知自己事, 落完水要扒返上黎, 都係唔制呀! 唯有將伸左2隻腳出去浸水.

嘩...玩完唯一既收獲.........成個人黑晒!!

因為包lunch 關係, 所以食完上車走. 返到kk市, k 最後殺貨, 超市、屈人寺通通成為掃貨既地點.

之後返去rest house 洗白白, 然後去食馬來咖哩, 因為相機放在旅館保險箱, 而 jenny 未返, 所以相片欠奉. 我地點左2個簿餅+桔仔冰+海鮮喇沙....全部都好好食!

之後老板娘 jenny 話帶我地食宵夜, 原來係大排檔. 望落去, 食客大部份是當地人, 而售賣既食物有山東餃子、奶茶、多士.....

好地道既茶室....我諗起亞飛正傳!

雞翼...脆漿整得好靚

一見到呢隻疑似糭既物體, 其實好驚, 食飽無耐, 整隻糭喎~ 一打開....

原來係炒米粉....嚇得我 p地~~

仲有呢杯好滑既奶茶

好多謝 jenny 請客. 最唔好意思係jenny 每晚都會和她先生daniel 一齊整理rest house 事宜, 例如編房、安排接人等工作, 今晚她帶我們出去, 即係又要遲做功課, 真係唔好意思.

返到rest house, k 就要執行李準備明日返港, 而自由就開始一人旅程呀!!

26-6-2009 沙巴第四日

2009-07-14T15:00:00.017+08:00

經過2日辛勞既活動, 今日我地決定去浮潛. 今日無帶相機出門, 用游水相機, 而k未晒相, 所以係...無相睇.
今日比平時晏起身 (自由要求訓夠先醒.....就係8點鐘)食過早餐後, 就起步出發去碼頭. 無錯係行去, 因為kk市實在太細, 加上k之前已探路, 所以我地係去, 順便買面包餵魚仔. (參加local tour 要成HK$2xx, 識行去自己買票, 每人HK$4X 就得), 到10:00am 買完票既時侯.......售票人對我地講一大堆野, k旨意自由, 自由又旨意k...所以佢up一大堆野, 我地都只係接收....幾成~
k之後講: "好似有廣播通知上船"
自由: 行去上船位望下乜環境先!
自由就拉埋k行去上船位置.....
上船位有一個工作人員, 自由將船票給他看, 他就示意我們上船, 自由仲好得戚咁話"都話好彈性架呀! 爭d要o係度乾煎"
上船後, 有一個旅行團上船, 上齊人後, 船就開呀! 嘩...船開得好快, 坐船頭既男人都被彈起....大家都好開心尖叫.....去到第一個島(kk市有5個島, 呢d小艇好似巴士咁, 會行勺5個島, 你可以自由選擇落島既數量, 由a島去b島, 你可以在買票時講明去幾多個島同幾點過島/回程)
我地以為到, 一彈起身, 船家就no~no~no~
我地又坐低, 到第2個島, 船家又no~no~no~
直至到全船人落晒, 都仲係no~no~no~
我地後知後覺, 到尾站知.....搭錯船...... @@
好在船上有好心人(當地guide)識廣東話, 幫我地同船家講, 船家打個電話lee古 lu後, gudie 同我地講, 佢會載我地去正確地點......
我地第一個島叫馬奴干島, 一落船, d水好似綠寶石咁靚, 好多魚呀!! 之後我地仲on 居居咁玩第一次浮潛+游水. 2個鐘之後, 我地就過第二個島-沙美島, 因為一開波已經搭錯船, 所以我地認唔到船家上船, 好在遇到第二個guide, 佢帶住2個台灣人, 仲帶埋我地一齊上船 (每一隻船來到要逐問), 呢個島最近kk市, 不過細好多, 仲好鬼大浪, 自由同k真係無用, 一唔到地就死游返岸, 驚死會浸親.
之後又同guide 一齊上船...總算順利呀!
一返上岸, 我地不其然行左去..........按摩!!
按完就去食海鮮. 因為在住處對面, 自由決定返上去取相機. 我地去左雙天食. 當日回程後, 我好似作病, 所以無乜胃口...蝕入肉呀!!

坐出面就有表演睇, 大多數都係老外, 我地d港燦, 梗係要空調呀!

喂..揀左海鮮先呀!自由想食虎蝦, 賣晒添! k想食龍蝦, 所以就點左龍蝦、芝士焗生蠔、蒜蓉炒蕃薯葉

椰青好唔掂, 唔凍已經係死罪, 仲要係酸既! 下次唔好攪我!

芝士焗生蠔

主角出場呀! 奶油煮.....好鮮甜. 不過自由作病, 只食一件, 仲要趙o左好耐!! 蝕入肉~~~

龍蝦頭煲粥, 好鮮甜.

呢碟菜係自由主食, 唉..有乜理由唔食貴野食平野??

好回味呀!!!

又過一關

2009-07-13T12:30:00.003+08:00

擔心左好耐既考試成績終於收到, 一科B, 一科C.....即刻鬆晒!!!
至於同學仔都合格....大家都覺得執身彩!!

點解咁講, 因為自由和同學仔各自將原本的考試範圍再縮窄(好明顯係懶),
點知.....考試時就"領野"~~
唯有將識o個d答到最好....

其實咁做好危險, 在學者切勿模仿!!

p.s. 仲有2科就放監呀!!! 哈哈哈~~

25-6-2009 沙巴第三日

2009-07-10T16:48:00.029+08:00

準時2am起身, 食過好簡單的早餐後, 2:30am準時出發. newmond 已經在門外等我們, 雨仍然下得很大. 天上一粒星星都不見, 在伸手不見5指的情況下, 攻頂的人陸陸續續起行呀! 好在天公亦好眷顧我地, 雨逐漸停下來, 而我......越行越熱.....我直情要除保溫衣, 短打上山. newmond 仍然是跟在K小姐旁, 終於見到要拉繩上既山, 因為太黑, 我乜都睇唔到情況下好順行就攪掂.

就係拉呢D粗麻繩上山

因為要手腳並用, 所以無乜影相, 呢張應該係天光前第一張相.....

行呀行...突然見好多人返轉頭, 心諗..唔係咁快上完頂呀? 之後問newmond 今日有無日出睇, newmond 話因為厚雲, 所以今日睇唔到..omg~怪不得咁多人走呀! 老實講, o個刻我都想調頭走, 只係想等有人開口....最終k小姐一句, "行左咁多, 無理由唔上"....咁唯有頂硬上呀!! 雖然我表面上同意, 心裡當然係....

k小姐....加油~~

終於上到頂呀(Low's peak 4,095.2m)!! 原來無位抖架!! 後面仲有好多人等影相, 走呀走呀!!

仲有好多人爬緊上黎...

另一個頂

好厚雲!

落山呀!!

check out、食早餐後, 10:30am準時出發. 自由行到第3個check point 時, 右腳膝頭開始痛, 我知道要慢行, 而newmond繼續傍住k小姐...行呀行...自由只在check point 涼亭等k, 只見k一出現...啊...乜皇太后上身, newmond扶住k一步一步落山, k連跟身既小揹袋都落在newmond身上...oh......

k又食又拎, 索晒油呀佢!!

因為天色越來越暗, 每次等完k再起步, 隻腳痛到死, 所以我決定臨尾2個point 唔等佢, 衝呀!

回程先記得我未影行山徑名稱

一返到end point, 3~2~1~.....均隆....落大雨呀!! 件衫又濕又凍又餓 (因為lunch 要在辦事處餐廳食, 12點至4點, 當我在其中一個point 等k超過半小時, 我已經知道我既lunch 凍過水, 好在我堅持要買朱古力, 而我回程已經5點幾)

我在等k期間, 有幾位女仕見我著短袖衫, 問我凍唔凍 (其實凍架, 不過d衫在newmond處, 無得取), 傾下傾下, 原來是新加坡人, 其實當地人大部份都非常友善, 香港少有呀!

到6點..k終於出現, k一踏入大門, 工作人員即刻拉閘收工......

k應該係全場最抵玩o個個........我知我咁講好衰, 不過k自已都係咁講.

因為太夜既關係, 無車出kk 市. 唯有搭的士, 自由又駛出慳家本領, 的士出kk, 車程2小時, 價錢180-200馬幣不等, 自由最後以150馬幣(折合港幣336)成交...講真自由好肉痛呀!!! 咁大個女都未搭過幾o舊水的士.

返到rest house, 見到條長長既樓梯, 自由同k即時暈低....仲話要去按摩, 都唔知點"冷"去!!!

老板仲話..."啊...行得走得, 即係無事呀!!""

是晚求其食d野就返去zzzzzzzzzzz

24-6-2009 沙巴第二日

2009-07-06T15:18:00.014+08:00

陽光普照的早上, 我同k小姐六點多便起床. 起床後; 吃過早餐後 (2塊多士), 七點半老板娘jenny 同我地booked 既泥猛的就到, 我地既征途開始了。在車內, 有一對老外情侶加一對本地人, 老外情侶好似食左安眠藥咁zzzz, 車上只有我同k小姐交談, 傾下講下, 2小時的車程就過去了. 我地終於去到公園門口.

辦過手續後 (即係俾錢), 辦事處就安排 guide 給我們, 名字叫newmond, 取過 packed lunch後, 再搭一程巴士, 到閘口正式出發呀!!

因為海拔過既關係(1,489米), 天氣十分清涼, 行了一陣, 自由既散熱系統已經運作, 全身濕晒. 沿途不停上上上, 好快到第一個check point. 圖中綠色正方形是一部"山水機" , newmond 就在這裡fill 水. 而後面其實是一個涼亭, 仲有廁所添. 休息期間, 有好多松鼠仔出現, 卡通片就見得多, 真既第一次見. 抖左一陣就出發.

一路上上上......沿途會見到好多porter, 揹日常用品上山, 我眼見既有石油氣罐、DVD機、行山人士背包 (幾個綁埋一齊)、餸菜.....

k小姐越來越慢, newmond 都跟著她, 我就一個人上左山看風景...感覺好正呀!

是日最後一個check point, 過埋就到rest house, 加油~~

到左rest house, 第一件事係......洗白白(7點後就無熱水)!! 之後另一特備節目就係搽按摩膏, 我同k博命搽呀搽, 自由亦體操選手上身, 不停拉筋, 唔知會唔會嚇親同我地同房既老外?

5:00pm就食晚飯, 你睇下....

好豐富的晚餐, 我同k小姐攪到好似擺酒咁幾大碟捧返去慢慢嘆, 味道唔錯(或者係肚餓關係) 自由食得好開心呀!! 仲有...是日協議一定要將取返來的食物食清, 因為揹上山真係好辛苦架.

食飽飽後, 諗住出去散步, 點知下大雨, 希望凌晨上山時停雨呀!!!

自由ee

2009-07-05T18:39:00.005+08:00

時間過得真快, 轉眼間由以前既貪玩、衝動、夜蒲寬死o靚仔/妹, 到而家變身成好爸爸好媽媽, 雖然見佢地為左仔女捱到殘, 但看到他們為左一句"爸爸/媽媽"而甜到漏既笑容, 我想是值得既.

但難過既事係自由要由姐姐變為ee ...嗚~~

細佬7個月大, 仍然是"成日諗野"既樣子

家姐好叻, puzzle 是佢親手切 (當然要爸爸提示)

星期日相約嫁到英國既kerr太茶聚, 2位小公主睇相就斯斯文文, 真人原來..........

家姐ally4歲半, 比較斯文, 不過一發現你"恰"得, 就會出事....

妹妹beth, 2歲半, 愛笑, 百厭精一名!! 最鍾意玩紙巾. 早知下次唔駛買禮物, 送包Tempo俾你得呀!!

今年好多bb出世/出左世, 想唔做ee都唔得呀!!

23-6-2009 沙巴第一日

2009-07-04T10:13:00.012+08:00

k小姐太明白自由既作風, 8:00am 打長途morning call, 但自由最終都係裙拉褲甩咁由九龍塘出發, 在地鐵站內, 衝呀....衝.....最終趕到9:30am 班車出發.

深圳國際機場一d都唔失禮, 地方整潔, 職員有禮, 尤其海關職員雙手將證件給我, 還說"不用客氣", 北上咁多次, 都未試過呀!

仲有得wi-fi 上網同飲水機!

第一次戴口罩搭飛機, 感覺......好焗呀!! 在機上, 空姐要派入境表, 如果是馬來西亞人係不用填, 當空姐行到黎既時侯, 姐姐問自由係咪馬來西亞人? oh...自由去泰國變泰國人, 去菲律賓就變賓賓...唉~

去旅館放低行李後, 就在市內閒逛, 仲一夜之間食左2間肉骨茶!

第一間食既肉骨茶(唔記得店名), 我揀了胡椒肉骨茶, k小姐揀了當歸肉骨茶, 胡椒味好濃, 味道似胡椒豬肚湯, 一路食, 一路標汗.

食完第一間, 即刻又去佑記食過, 今次我地不要飯, 只要肉骨茶, 味道和第一間完全不同, 我覺得最好食既係肉丸, 而不是肉骨茶. 食飽後, 沿海傍行, 見到一間cake shop, 自由又入去呀!

一入去, cake of the month 係榴槤芝士旦糕, 二話不說, 一件2份!

榴槤旦糕樣子平凡, 一試...除左好香既榴槤味, 仲有好多好多果肉纖維, 好味但好滯! 赤柱的jenny bakery 都有得賣, 要$220一個, 呢件只係馬幣$7, 加一連稅$8.05, 平過香港食. 食飽飽後, 返回rest house 執野明天上神山呀!!

黑!

2009-07-01T23:52:00.004+08:00

旅途上既手信之一.......曬到好黑!!

失憶

2009-06-19T17:19:00.002+08:00

o尋晚學麥o麥咁, 有豬腩肉就游多幾游, 點知......
我唔記得左點游呀!!!!!! 有無好心人講下蛙式步驟呀!!!!

正確d講係手腳唔協調, 真係撞鬼呀!!

我小小記憶:
1. 撥手
2. 頭升起, 吸氣
咁隻腳應該幾時開始收腳呢?????

游左一陣, 一時得一時唔得....真係要游多d先得.

假如生命只剩廿四小時!!

2009-06-17T17:41:00.003+08:00

溫書溫到好悶, 突然諗起一個n年前被人問過既問題,
就係....

假如生命只剩下二十四小時, 你/妳呢刻最想做什麼事???

去濕毒必飲

2009-06-17T14:02:00.002+08:00

2星期前行完山, 又出到一頸都係粒粒, 為左唔想帶埋粒粒旅行(雖然我預左會再有), 不過都係清一清好.
上星期煲呢個湯飲, 飲左2日, d粒粒褪左好多, 所以要介紹下俾d有同樣煩惱既人.

材料:

1. 鮮土茯苓
2. 地老鼠
3. 雞血籐
4. 果皮
5. 蜜"早" (我唔識打o個個字)
份量: 我只是同街市檔內說明幾多人飲, 就幫我預份量。(25元一包)

做法:
1. 將地老鼠用淡鹽水浸泡 (約十五分鐘),
2. 果皮用水浸軟後, 用鐵匙刮去果皮(內裡黃色部份)
3. 其它材料用清水沖洗後, 將所有材料放入煲內煲3小時即可飲用。

備註:
1. 如果沒有敏感 (如口痕) 地老鼠可不浸鹽水;
2. 如當湯水, 可加豬肉煲, 平常當水飲, 可不落肉, 加蜜早或糖冬瓜便可;
3. 呢個湯老人家小孩都可以飲, 主要去濕毒. 如沒有濕毒症狀 (如生粒粒, 皮膚痕, 發紅) 可加牛大力, 亦可詢問檔主配搭。

又爛鞋

2009-06-15T22:55:00.002+08:00

點解每次都要在行山時甩底????

好在今次係在尾段上赤徑時發現

旅伴 k小姐向自由作出勸告

你都係帶埋支AA膠出街呀!

另大家如果行西貢要小心, 因為當日的路線是由西灣亭起步, 經西灣, 咸田灣到赤徑, 沿途有好多尼泊爾人(分幾批, 每批約6, 7人). 係由水路來香港當黑工, 初時我地都唔知乜事, 直至見到海關拉人先知. 所以奉勸大家行山時要小心些.

電話號碼...加密??

2009-06-12T17:19:00.002+08:00

話說亞sir 呢排個直線成日響, 包括問路、問車、問舖、問租.......

亞sir 有日頂唔順, 問客點知個直線號碼, 客回答"查電話公司", 問xx大廈管理處, 1083就俾呢個電話號碼....
亞sir 之後叫肥婆打去1083, 將管理處既電話號碼改回, 點知.....
梗係無理亞sir呀!
肥婆呢幾日放假, 亞sir 就日日陪住我, 今日佢又勾條筋問呢件事, 咁我唯有打去1083....

點知............

小姐 xxxxxxxx呢個號碼查唔到, 原因係有人落左加密!!
唔係呀! 一個管理處電話落加密.....傻架! 亦因為加密左, 必須要肥婆send 貓貓去攪! 我如實報導, 亞sir 先放過我!!

心諗..而家d高層 (肥婆個銜頭都有"高級"2字) d 諗法真係高深莫測!!

Focus 80後的64故事

2009-06-04T10:09:00.003+08:00

節錄自6月4日都市日報

二十年前的今天，解放軍駕着坦克車長驅直進北京天安門廣場，以武力清走在廣場示威的數以萬計學生和平民，造成多人死傷，發生了一場震驚全球的流血事件，這些都是不爭的事實。不少人認為是中國政府血腥鎮壓要求民主自由的學生，是一場大屠殺；官方則形容為一場政治風波。
二十年已過，不同人的心目中都有他們的「六四故事」，經歷過的人，至今仍心感傷痛；亦有為官者認為，大家應放眼中國今天的經濟成就，經濟壓倒一切，不應重提舊事；而對於80後的一輩，他們沒有親身經歷過「六四事件」，對六四所知不多、認識不深入。到底，「六四事件」對他們而言又是一個怎麼樣的故事呢？

80後的一代，享受着中國經濟急速發展的成果，他們普遍沒有「六四」的包袱。從感性層面上，大部分人都會同情遇難的學生，對中國政府的做法予以批評，但「六四」爭取民主、爭取自由、肅貪倡廉的深層意義，於他們而言便顯得抽象。
隨着時間流逝，「六四」可能會因而被逐漸淡忘，但對於一班經歷過的人，「六四」就是他們心中的一個烙印！

陳同學　22歲　大學三年級學生
「六四」對我來說很遙遠，有時透過新聞了解到一些，所以像是不陌生，但卻不熟悉。我不會有「六四」的包袱，不會有太大感觸。屋企人說當年北京的學生是收了錢才去示威，我自己在想，這麼大的運動，學生哪來金錢去支持呢！有時會認同家人的說法。但當看見一些畫面，我覺得場面很血腥，那時候又覺得是中國政府不對，對於「六四」實在很矛盾。

王健　26歲　內地生
說實在的，在「六四」後20年中國的經濟發展的確很厲害，社會、民生進步很大，如果單從這方面的角度來看，當時採取控制，對國家是有正面的作用。當然，我也不贊同採取過分的武力，不應該殺學生，畢竟他們都是平民，所以我也同情那些學生。而是否需要平反，我個人覺得先不要去考慮這個問題，歷史早晚會有一個說法，現在都是要掌握着發展機遇，待經濟再增長多幾十年，有一定的繁榮基礎，到時候再談這個事情。

我看後真有點氣憤, 氣憤是不要將事實歪曲, 什麼收左錢去示威, 或者他們的父母是極支持共產黨, 但說話要客觀, 唔知唔清楚真不要亂講, 你可以選擇不發表任何意見, 但不可歪曲事實。我想一個有人性的人都沒有勇氣說出這番話。另一個內地生的言論亦讓我o 咀, 對的是平反不是一朝一直的事, 但要等經濟再增長多幾十年先再說? 如果不攪好經濟, 就不談這事? 事實就是事實, 無論經濟再好, 都不可以抹殺事實。

吹脹

2009-06-03T10:12:00.003+08:00

再一次證明天王係一個A字人!!

天王: 呢D supporting 你(自由) 要唔要夾?
自: 你要夾就夾...你決定 (嘩!坐左成年仲問埋d低能問題)
天王: 咁即係你平時要唔要?
自: 你要夾就夾, 唔係我話事!

dead air 分零鐘, 天王唔忿氣地講
唔係喎, 我見你有d 會夾supporting 架喎!

自: D supporting 唔係我夾, 所有supporting 唔經我手, 至於夾唔夾, 唔係我話事, 係你主任話事......

其實只係一個好小問題, 至小唔係一個會死人既問題, 點解天王都要問?
坐左成年, 仲問D FILE 放邊 (得一個櫃, 約十零個FILE), 其實每個月出糧既時侯會唔會有D唔好意思?? 呢期仲要興玩唔覆電話, A到暈.

考試

2009-06-01T14:10:00.002+08:00

呢個六月將會好忙好忙, 忙考試、忙旅行、忙ISO...
將亞sir 俾既天書溫習及查字典, 一打開...就好似有安眠藥散發出黎, 好~眼~訓~呀!
我相信讀書真係要講點緣份! 好似有些人永遠都做不成朋友一樣, 大家都沒有憎或討厭對方, 但總是欠缺左d野咁, 做不成朋友!!

訂機票

2009-05-27T10:36:00.003+08:00

尋晚由k小姐負責訂機票, 因為我地既出發及回程時間都不同, 要分2次網上預訂, k小姐既機票ok, 但自由既機票就....."系統故障, 未能成功"........oh.....
唔通我要同k小姐 "忍著淚說goodbye" ????

k小姐...你唔好怪我.....哈哈哈~

開估~

2009-05-26T17:42:00.008+08:00

我想買既黑鋼錶、1398、939、羊仔皮包包.......全部化為烏有, 變成...

沙巴之旅!!! 今次(我) 主要目的....神山攻頂!!
機票未book, 山上宿位未俾錢, 仲1516留唔留多日.......都唔知最終會唔會食白果, 所以一直唔講住, 希望唔會白做呀!!

後記:
沙巴 - 一個位於東馬的地方, 我多年前已聽聞這地, 這片土地有全東南亞最高山峰、刺激的激流、世界5大潛水勝地之一、還有全世界最大的花朵.......仲有好多好多我未見過的自然奇境, 我好想去親身感受, 只是每次的計劃, 不是機位問題, 就是旅伴問題, 一直都未能成行。
直到k小姐某日來電.....我地一拍即合. 雖然計劃一波多折, 由出發日期到住宿訂位都出現唔少難題(爭議), 但最終都一一解決, 或者就是一個自由行必有的經歷, 無計, 要自由唯有辛苦d!!
我覺得神山同我既距離又近d呀!!!

世事豈能如意???

2009-05-25T23:02:00.005+08:00

一個無心插柳, 在毫無預備之下, plan 一個我恨左好耐好耐既地方....
攪左一個下午, 以為攪掂晒, 點知......又有小事tick 住...頂!!
我真係想投降!! 唯有等明天睇e-mail!!

或者呢d就係backpacker 既樂趣(無奈中)!!

血拚

2009-05-23T21:19:00.003+08:00

呢個星期點忙都要抽時間去參與一年兩度既大盛事......鬆糕同二田既大減價!!
出奇既係...以往出血情況飄忽不定的我, 在鬆糕果然一滴血都無留低, 最後覺得大風大雨黎到, 無理由一件"戰俘"都無就走, 最後就帶走朱古力糯米磁($52.2/3盒)!

唉...錢...其實我唔敗在鬆糕, 但係敗在其他地方!!!

自我檢討

2009-05-22T16:36:00.002+08:00

由上星期尾至星期頭, 我都忙. 忙溫書、忙煲劇、忙搵資料......
到星期中先可以抖抖氣.....
忙既時侯連亞sir 醒天王既原因都聽得唔清唔楚, 不過都有精警既對白~

sir: 我唔係你部翻譯機,我唔係你老豆, 我係你老細!(聽到呢, 由忙緊即刻回魂, 收聽中)
我請你返黎係幫我做野, 唔係我幫你做野!!

如果我係天王, 我一定會檢討自己,避唔係一個好辦法!!!

其實亞sir除左師奶d之外, 佢絕對係一個好脾氣既人, 至少佢都仲頂得順我!!!

過火 - 張信哲

2009-05-21T12:30:00.001+08:00

呢幾日時常在腦海出現既歌!!

做姊妹

2009-05-21T09:49:00.003+08:00

呢排日煲夜煲日劇, 連check e-mail 上facebook 既心情都無, 尋晚終於ko 左一套. 心情係..有d失落!
前日收到大口狗來電, 佢第一句就問, "你有無上facebook?"

自: 無呀! 做乜呀??
大: c小姐搵你同我做"姊妹", 我應承o左呀!!
自: o下.....哦.....邊日呀!!!
大: 年尾.....我問佢d兄弟得唔得? 得既就做, 唔得唔做! hehe~~

喂...大口狗, 唔好爭食好喎, 留番d機會俾我地呢d中女發下市!!!

人民英雄

2009-05-15T23:24:00.002+08:00

睇完今日蘋果日報的摘譯, 我看得著迷+哭了!!

中文版於本月底有售!!

溫馨提示: 小心俾蛇咬!!

2009-05-12T14:27:00.002+08:00

馬桶如廁長蛇鑽出咬下體台漢身心受創只敢用「私家塔」

(明報)2009年5月12日星期二 05:05
明報專訊】俗語說「一朝被蛇咬，十年怕草繩」，不過台灣南投一名林姓男子，卻因為遇上儼如電影情節般的驚慄經驗，在家中馬桶內被蛇咬傷命根子，讓他直說「一朝被蛇咬，十年怕馬桶」！
「誰會想到馬桶裏會躲着一條蛇？」家住南投埔里偏遠山區的50歲林姓男子，4天前晚上11點左右坐上馬桶小解時，突然感到下體有如被刀刺穿般疼痛，他本能反射地站起身來，赫然發現鮮血不斷從命根子下方滴下來。這一驚非同小可，回頭一看，「一條大蛇竟卡在馬桶內，還昂頭對外吐出舌信」。
1.7米大錦蛇幸無毒性
被蛇咬傷命根子的林男，第一時間浮上的念頭是怕大蛇跑出來傷人，但按冲水按鈕卻無法將蛇冲走，隨後他拿起馬桶刷戳蛇，但蛇還是不退，於是他蓋上馬桶蓋，拾起一塊石頭蓋住後，拖着血淋淋的下體向鄰居求救。
林男在醫院向醫生說，大蛇是具劇毒的龜殼花，但醫生擔心誤打血清反而會致命，最後由陪同林男的鄰居回到現場，用蛇鈎、蛇夾將躲在馬桶內的蛇拖出後，證實是長達1.7米的黑眉錦蛇，雖然證實無毒，但巨大的身軀也足以嚇人。醫生說，蛇的牙齒為倒鈎狀，林男幸運地僅傷及陰囊表皮，若深入睪丸，後果不堪設想。
馬桶內怎麼會有大錦蛇？連林姓男子也覺得不可思議。由於林男住在山區內，雜草叢生，眾人推測蛇本來就多，加上林男家中化糞池日久失修，出現裂縫，黑眉錦蛇可能因喝水或捕食老鼠等而鑽進化糞池內，再循管道鑽到馬桶口卡住。
未怪責「兇手」野外放生
如今林男一看到馬桶就有「心理障礙」，院方雖一再向他保證醫院廁所「安全無虞」，但林男只敢用自己買的簡易式馬桶，「這不是安全問題，而是看到馬桶就會想到咬我『蛋蛋』的蛇」！
至於那條「行兇」的大錦蛇，雖然差點送命，但最後得到林男的寬恕，被放生回野外。林男說，如果錦蛇繼續卡在馬桶，過幾天可能會餓死或窒息，蛇咬他是「發出求救信號」，一切都是「因緣際會」。

各位男仕睇完後, 會唔會去廁所前check下先呢????

鐵閘壓死人

2009-05-05T14:28:00.002+08:00

紅磡紅菱街社署庇護工場鐵閘壓死一名外判清潔女工，社署說，鐵閘早有問題，本來打算下個月更換。
鐵閘壓死女工意外發生後，社署到場視察的九龍城及油尖旺區福利專員黎馮寶勤說，該個庇護工場建築物在2002年落成，一直由政府負責維修。出事的鐵閘在去年12月有維修過，但情況不理想，已發現開關不順暢，經多次維修，相關部門建議只有更換才能澈底解決問題，並安排了在五月時進行更換。
意外發生在今早7時多，在紅菱街1號社署轄下的中度弱智人士庇護工場「恒毅實業及宿舍」工作的32歲外判清潔女工女子，推開正門的鐵閘時，鐵閘突然倒塌，擊中女工，女工頭部重創，昏迷送伊利沙伯醫院，經搶救後在8時半證實死亡。
倒下的鐵閘約2米乘1.5米，現場所見，鐵閘頂部的鉸位損毀及鬆脫。
(即時新聞)

既然一早知道鐵閘有問題, 點解不安排早一點更換???

職場低能 ing

2009-05-05T10:08:00.002+08:00

我承認我既EQ比較低, 常為一些小事而令自己皮質醇處偏高, 不過自從學識金句"樣樣睇開d, 人都開心d"後, 皮質醇偏高既情況已有改善.
不過人始終都有情緒冒時侯, 尤其晨早流流未訓醒時, 自我控制能力就會偏低....

自由今早如平常一樣check 公司e-mail, 突然天王在我位既側邊開口.....

天王: 喂! 呢d去leasing 既駛唔駛寫番去邊????
(你叫屋企隻狗都有個名呀! 我亞媽又無同我改名?? 你寄信唔通唔駛寫地址+收信人姓名?郵差會知你俾邊個??? )

自由: 隻眼一直望住個電腦屏幕, 冷冷一句: 「你鍾意寫就寫!!」(自由又一次抗戰到底)

我知我好寸, 但係你唔衰先, 又點會俾位我入??
我又為"自氏宗親會"爭一口氣!

宅女新玩意

2009-05-04T17:21:00.006+08:00

一直都想買pmp 來調劑悶爆既生活, 唔係價錢太貴(之前睇i-touch), 就係個樣勁衰 (又要平又要靚...好一個典型港女) 得"井底蛙"介紹, 4.3" 屏幕, 1600萬色, 除左睇戲聽歌, 仲有收音機、電子書、圖片、錄音...而價錢只係.....$800, 我....只可以講, 咁既價錢, 抵玩.

p.s. 好低能係..我近期先學識點樣dl 戲入機....多謝大口狗嘔晒血在msn 教我. ^^

藥膳補臟

2009-04-28T12:27:00.005+08:00

最近我既死敵---肥婆放大假, 工作量由輕量去到極微量, 亞sir不在既日子, 我勁 hea...攪掂手頭上既工作, 我就開始我既網上生活.....
在"韋太烹飪教室"介紹, 睇藥膳補臟, 呢個節目好實用(亦證明我好c9) 內容除左教煮餸煲湯外, 亦會教一些小知識, 例如: 分寒/熱底、中藥藥性、保健穴位等, 資訊性好豐富。有時間不妨一看.

http://ent.i-cable.com/cen/program_maria_kitchen/fatma_category.php?group_id=18

芒果班戟

2009-04-24T15:00:00.002+08:00

今次呢個食譜在"營養師手記"裡見到, 好喜歡啊! 所以同大家分享!

材料：
芒果 1個 (近排d芒果當造)
奇異果 1個(便便唔暢通就揀啦)]
油 1-2茶匙(用來煎班戟)

班戟粉材料：
麵粉 12湯匙
脫脂奶 1⅓杯
水 1/2杯
雞蛋 3隻
代糖 6茶匙 (建議用splenda)
幼鹽 1/4茶匙

忌廉材料：(keep fit先加，減肥就少用喇！)
低脂忌廉 300毫升
淡忌廉200毫升
代糖 4茶匙
白糖 4茶匙

1. 做cream當然要用打蛋器啦！
2. 班戟的材料混合後，可用平底易潔鑊少油煎。
3. 份量可以做約6片大大的。
4. 食法有很多種，可加新鮮雜果，酸乳酪又得。

有無人知"低脂忌廉"係乜東東? (又落低脂, 又落淡忌廉???)
唔知我又成唔成功呢???

生活小記

2009-04-22T12:44:00.010+08:00

影左好多相用來寫blog, 不過太懶呀! 一直留在電話內, 沒有取出, 今日一次過post 呀!!

好無誠意添! :p (日期欠奉, 只跟發生前後post)

大家仲記得忍者小靈精嗎? 呢套片係陪著我大既卡通片之一, 而圖中既公仔叫"獅子狗", 係大茄一名, 不過我就覺得佢幾cute. 這日同妹妹在冒險樂園玩擲彩虹時, 妹妹送俾我的..多謝妹妹!!

應該係4月7日, 同大口狗去旺角睇相機, 在廣華醫院對面, 一個賣模型、war game用品為主既商場內, 有一檔吃印度食品, 店員用不太純正廣東話招呼我地, 我地就坐在商場內大啖大啖食....沿途好多人眼望望 + 食唔食得既眼神望住我地, 我都費事理.

我地叫左燒雞翼、咖哩牛腩、旦簿餅等...埋單盛惠$72。

新彊回族簿餅店....但係賣印度食品....r頭!

每年都無特定買生日禮物俾自己, 之前睇中一對耳環, 不如就在這個好籍口出手...

點知....做特價, 由$270減至$130...

條件係要去東涌取貨, 地鐵來回不過$27

嘩....計埋車錢都平$113......好野!!

芝麻糊

2009-04-22T12:18:00.003+08:00

因為買錯左生黑芝麻, 唯有用佢黎整芝麻糊, 唔好浪費麻!
參考網上多個食譜, 發現大部份係用粘米粉、生粉水埋糊, 我就改用米漿, 都ok喎!! 至於份量...我今次係"斷估", 大約係 8(黑之麻) :2 (米漿), 好在外表同味道都食得落....hehe~

(張相樣衰左d添 :p)

材料:

黑芝麻
白米一小撮
糖冬瓜半包
水 (1.3公升, 因為我用豆漿機整)

1. 白米用清水浸半小時, 備用;
2. 黑芝麻清淨, 用白鑊炒香; (白鑊即係不加油既鑊, 小心芝麻炒焦)
3. 白米+黑芝麻+水放在攪拌機打碎; (我用豆漿機, 所以可以省卻這步驟)
4. 用豆漿袋隔渣, 然後重覆此步驟1-2次;
5. 放入煲內煲半小時, 加糖調味即可。(我就連糖冬瓜一齊煲, 煲好取走糖冬瓜即可)

備註:
1. 因為份量"斷估", 白米浸多左, 我打漿後用來做mask + 腳部磨砂, 做完後皮膚又白又滑又軟 ^^
2. 因為用豆漿機連渣一齊煲, 煲後黑芝麻渣不用棄丟, 用來做身體磨砂+mask+洗髮.....正!!
(尤其洗髮, 洗完後頭髮有光澤、不油、髮質柔軟)

小酒窩 - 林俊傑 + sa

2009-04-21T14:44:00.002+08:00

Sweet sweet la~~

樺樺趣記

2009-04-21T12:11:00.001+08:00

一連幾日的復活節假期, 為左想同樺樺一齊切旦糕, 相約大口狗一齊去探樺樺 + 遊樂場, 究竟樺樺有幾顛......

傻妹雖然3歲, 但組織及表達能力非常好, 佢最鍾意打千秋, 一去到就"訓示"我地...

樺: 拿...你(自)排我後面, 你(大口狗)就排佢(自)後面, 你推我先, 跟住我推番你, 你(自)又推佢(大) 知唔知道?

自 & 大: 知道~ (你推得郁先講呀^^)

打完千秋, 佢就周圍走, 情緒仲好high, 部相機一對住佢, 佢就擺佢d post 出黎.....至於細佬, 由佢老爸(即係我地個賓佬)湊住! 玩左半個鐘, 我同大口狗都得番半條人命, 加上天色越來越陰, 所以就返歸呀!

因為細佬仲細, 遊樂場無佢份, 唯有返家同你影多幾張相.

細佬: 我似唔似加菲貓????

你睇細佬幾"笛"!! (無o個個字出呀!!!)

玩完就梗係食旦糕呀!! 點知.....

為食貓即刻圍著旦糕唔肯走....

就係咁我地就歡渡左一個下午...多謝樺樺 & 細佬!!

後記:

沿途樺樺老爸同我地分享左 + 親眼見到樺樺既寸事:-

寸事一:

有一天爸爸帶樺樺搭地鐵, 坐在樺樺旁邊是一名約3歲的dee dee, 由賓賓帶住, dee dee 可能去街好開心, 不停大聲高歌, 在旁既樺樺突然指著dee dee說: "你好嘈呀!"

dee dee 當堂 o 咀~~

爸爸當時瘀到爆, 我地當然笑爆!!

寸事二:

在遊樂場時, 有個dee dee 在滑梯上將自己玩既車仔, 由高處sir 落去, 突然樺樺走過去用腳踩住架車仔, 用眼神示意dee dee 滑梯唔係咁玩, 嘩....人地老爸望住佢, 我地拿拿淋抱佢走呀!!衰女...成日周圍點火頭, 想話唔係佢個女都唔得!

收拾心情

2009-04-17T12:26:00.002+08:00

一連幾日既復活節假期過去, 但心情一直處於"遊魂"狀態, 我相信同我唔願返工對住班怪獸有極大既關係, 但唔願歸唔願, 我都要食飯架. 所以玩埋呢2日, 下星期真係要"六魂合體"先得.

p.s.
有日拎起本hk taxation, 先知大鑊~ 要加把勁先!!
今晚有時間, 試下整芝麻糊, 希望成功呀!! ^^

復活節快樂!!

2009-04-09T17:50:00.001+08:00

一連四日既假期, 隨著六點鐘打咭機既聲揭開序幕!!!

ka~ka~ka~ 開始!!

祝各位復活節快樂!!

自由行=自由痕

2009-04-07T17:47:00.002+08:00

邪門呀!!
一劑三冬茶將喉嚨痛收復
令一隻妖怪....汗癬又襲擊我條頸!
每逢潮濕/炎熱既日子, 我條頸就會痕, 越r越大, 好在只在頸部發作....
今次我相信同我食左芒果有關....芒果..我不嬲都無事, 唔通要我戒芒果??

NO~~NO~~NO~~

草猛忘我演唱會

2009-04-06T14:41:00.004+08:00

接到大口狗電話說因為妹妹臨時有事, 不能欣賞草猛, 問自由有無興趣去? 自由當然一口答應呀!!

入到場館, 坐無虛席, 八點四十分, 嘩...熄燈........3..2..1..開始

由"三分鍾放縱"揭開序幕, 觀眾情緒非常high, 連平時手都唔拍既自由同大口狗都由頭嗌到尾, 到"忘情森巴舞"時, 直情企起身添....全場high爆.

3隻草猛亦都絕不欺場, 廢話小講, 衫亦小換, 每次連續唱就三至四首歌先停, 比起現今既歌手唱一首又嗡一大輪野回氣, 真係爭好遠.

我同大口狗尋晚就好似返回1x年前讀書階段, 好high 呀!!

多謝大口狗送了一個 high 爆既晚上給我!!

三冬茶

2009-04-06T14:36:00.002+08:00

多謝師傳送給我的三冬茶!!
味道甘甘地, 好耐飲, 由上午九時到二點半都仲有茶色, 最驚喜係原本喉嚨痛既我, 飲完喉嚨痛減輕好多....

再次多謝你既三冬茶!!

Batani Olive Skin Serum

2009-04-01T15:29:00.006+08:00

之前睇 erica 介紹呢支油, 已經有d心郁郁想買, 尋晚返學行過一間美容店, 佢地有取呢隻貨(平時又唔見咁好眼), 隻腳不受控制咁行左之入去, 店員既態度好好, 好耐心咁答我問題 (梗係成個財神送上門, 梗係好耐心呀!!) 之後......好似中左迷煙咁乖乖俾錢.

講番正題, 我買既主要原因係頸紋勁深+多, erica 話佢媽媽用後頸紋淺左, 同firm o左, 所以一於試試, 衰左咪搽手咯. 尋晚試完, 頸紋有無淺就未知, 不過今日照鏡明顯收緊, 朝早起床, 塊面亦都無油立立, 不過唔知係咪年紀問題, 我覺得搽面有d乾, 要加lotion, 但效果都好好, 至於搽完手, 隻手即時滑滑.

雖然佢細細支, 但每次只用1-2滴 (我係大面人), 所以好耐用.

我既用法: 洗面---爽膚水---olive skin serum

erica 講正確用法 http://blog.elle.com.hk/?uid-88161-action-viewspace-itemid-1104

八週年

2009-03-30T12:40:00.003+08:00

今日睇 the8 既 blog, 先醒起原來19/3 係我在這間公司既 8週年!!
呢8年來, 有苦有樂、高低起跌、人生中要交既學費都嘗過了。
曾經有人問過我一條問題, 覺我上山易d定係落山易d?
我既答案係: 在乎自己點睇。上山和落山無話邊樣特別難. 當你人在山上, 點難行既山路你都要行, 無人可以幫到你. 正如工作上, 都要學習獨立, 遇到問題都要自己解決。
多年來, 我好多謝我既智囊團c小姐同w小姐, 在工作上佢地係俾左好多意見我, 令我逢凶化吉, 有驚無險, 真係要多謝佢地!! ^^

識做人!!!

2009-03-27T23:20:00.004+08:00

呢個妹妹係朋友既女兒, 今年3歲, 之前見仲係岩岩學行, 轉眼間識行識走, 仲好鬼識"乙水"人, 一見面就口甜舌滑, 仲好 friend 咁 i 埋黎...妹妹你咁樣, ee 好難唔跌錢架喎!!

呢個係細佬, 你睇佢幾 cool! 好似好多野諗咁!!

妹妹爸爸有日來電給我朋友, 問當日既hello kitty糖在那裡買? 朋友說是我買的. 所以朋友打電話問我在那裡買. 下次再見時, 我一定買俾妹妹你食.

攝於 1/3/09 荃灣

陰濕!!!

2009-03-26T17:47:00.005+08:00

原來今日4:30 我要去HQ training, 4:40 收到電話問我點解仲坐響度??
原來肥婆收到e-mail 無同我講, 所以今日下午我abs.

我本著一個宗旨, 私事零交流, 公事上我係極度合作, 你諗住玩陰濕....我未驚過...嘿嘿!!

唉...冤冤相報何時了!!

後記: 我今日等亞sir 返黎先問肥婆:

自: 肥婆, 我尋日原來要training, 你有無收e-mail?
肥: 咁你有無收呀??
自: 無呀!! 不過好似話send 左俾你!
肥: 啊..好睇下呀!!
自: 唔該!!

好明顯肥婆唔會俾答案, 我亦唔需要佢個答案, 我只係要亞sir 聽到就得呀!!

悠長假期

2009-03-25T14:56:00.002+08:00

令人懷念的日劇~~~~
唔駛問, 我當然投竹野內豐一票呀!!!

2009-03-25T14:29:00.005+08:00

之前我釋放太多負能量, 所以今次要post 番個good news.

就係accounting 我合格了. (真係要湯雞還神呀!!)

無辦法, 我真係一個數字痴呆. 對上o個次考試, 要出動小學同學幫手,

直情慘到想喊, 今次合格, 我相信同有得claim 番錢有莫大關係.

"有錢駛得鬼推磨" 唔係講笑架!!

零食

2009-03-20T16:03:00.004+08:00

其實我以前不太喜好零食, 呢排可能返工太無聊 (悶), 有時都會買零食調劑o下, 今日買入既零食.....

在"有食緣"買, 盛惠$35, 味道又真係幾好, 不太甜, 食完唔會好口乾, 如果價錢可以平一d就更好. ^^

其它入圍零食包括:

香口膠

焗杏仁

提子乾

紅莓乾 (一食唔停得口)

開心果

至於雪糕....呢d梗係留番屋企慢慢嘆!!

庇護工場

2009-03-19T14:21:00.004+08:00

我一直都覺得我公司係一個庇護工場, 唔係講笑, 有例子o架.

1. 某日花姐(工程師) 話有d order 未找數 (08年11月, 12月), 我發現未有Invoice, 叫 vender 再寄, 點知.......原來係天王收埋晒, 佢原來唔知乜野叫做 invoice, 唉... ( O咀中)
主任呀主任, 你家都會有買傢私、電器, 點會未見過 invoice .....

2. 如果小妹放假, 每日既 report (人數表, 只是根據工咭既出席人數入番電腦再send 俾亞sir攪掂) 亞倫爺 (大廈主管) 果然話唔識整.......
註: 大廈主管要有中五程度

咁仲唔係庇護工場係乜????

我又玩!!!

2009-03-18T16:48:00.004+08:00

取自小瓶子blog

呢个与其话系性別測試, 倒不如话系港女測試. x 2

金錢名牌篇

[ ]人地唔送貴嘢等於冇誠意
[x]有時會將金錢花費於不必要物品 (人一世物一世, 我都會買d貴價野食返屋企同家人一齊嘆, 奢侈一次咁多呀!)
[ ]買嘢最好男友俾錢，男人請食飯天經地義
[x ]試過為幾十蚊、甚至兩三蚊而爭執 (試過在外地俾人岐視, 老外有房轉, 中國人無房轉, 為5蚊美金差價, 放低房租就鬆人!)
[x ]同樣價錢嘅手袋，只會揀名牌 (如果一樣價, 點解唔虛榮下?)
[ ]平衫著一兩次就唔要，名牌則相反 (只我我鍾意, 佢一日唔霉, 我都唔會俾佢退役)

Total: 3/6

夢想篇

[ ]時常覺得街上有男人注視我 (唔係呀?? 咁都有市場??)
[ ]覺得自己不乏追求者 [ ]曾幻想自己貌似某明星 (朱咪咪??)
[ ]喜歡閱讀愛情小說，並幻想自己是受萬千寵愛的女主角
[x ]不時幻想嫁個有錢人，唔使做有人養 (尤其受完老板氣….如果我第日發左., 我一定……)
[ ]成日幻想同醫生或律師一齊 (咪攪! o個d通常都有d辟好)

Total: 1/6

外觀篇

[ ]髮型以齊陰為主(可愛教主咩??)
[ ]花很多時間及金錢於打扮，但效果不顯著 (咁仲丟錢落咸水海? 留番d錢買姑婆屋把呀!)
[ ]全身上下起碼幾千（包括衫，鞋，飾物) (有咁富貴就好咯!)
[ ]崇尚西方國家，唔係外國嘢唔買 (咁國內野算唔算?? 話晒都要有張回鄉證先去到買)
[ ]愛買化妝品；出街化濃妝 (訓同靚, 我揀訓)
[ ]覺得自己衣着一定好過大陸同胞 (我一定貴唔過國內同胞話晒佢地一身名牌**a貨另計**)

total: 0/6

性格篇

[ ]喜歡裝可愛 (10歲樓下都可以接受)
[ ]人地講咩都信，毫無判斷力 (即係低能??)
[ ]我承認自己功利庸俗
[ ]我貪慕虛榮
[ ]我口頭話唔中意港男，實際上係因為溝唔到 (唔係溝唔到,係溝通唔到)
[ ]我咩都要男人就哂我
[x]我覺得發姣可以吸引異性 (姣婆遇著姿粉客)
[ ]扮可愛，行為幼稚、如同小學生 (即係低能?)
[ ]成日溝仔，人地唔受就扮可憐、扮失戀，甚至揚言要自殺 (唔好咁天真同傻呀!)[ ]自己永遠是對的 (y理教主?)

Total: 1/10

生活篇

[x]愛睇壹週忽週或MILK，對娛樂新聞比時事經濟更清楚掌握 (唔駛我買又無聊時都幾好架)
[ ]迷信星座，報紙只會睇每日星座運情
[ ]喜歡把自拍相放上網讓人瀏覽
[ ]成日上交友網或流連酒吧結識異性
[ ]只行Shopping Mall，謝絕郊遊
[ ]能夠運用感性的火星文字句 (第3類接觸??)
[x]喜歡講是非或跟三五知己分享別人的迭事趣談 (唔講會頂唔順)
[ ]鍾意Hello Kitty，並批評喜歡日本動漫的香港男性為毒男
[ ]除咗開IE上網對電腦不甚了解，唔識分256同512
[ ]經常打人，男人還手就話蝦女仔 (燥狂??)
[x]男女平等之餘，男人要講風度 (hehe….呢d就…..好難講)
[ ]男人不少得要擔擔抬抬 (呢d唔係女人做架咩??)

Total: 2/12

戀愛篇

[x]希望男朋友咩都識 (我都想知邊度有)
[ ] 錯事責任歸咎於男友身上
[ ]任何事亦以分手作要脅 (如果佢話好, 我咪領野?)
[x ]同男人一齊第一件事係幫佢「保管」存摺 (保管存摺有鬼用咩, 梗係要張附屬咭..kaka)
[ ]試過飛咗男友後又搵返個人話自己寂寞，冇人理 (呢d咪犯賤咯)
[ ]經常性發脾氣 (精神病??)
[ ]一日男友冇打電話黎，就覺得佢有外遇
[ ]網上分享和男友嘅嘢，冇啲私隱
[ ]一邊話男友花心，一邊走去溝仔
[ ]唔比男友睇靚女，自己迷戀男明星

total: 2/10

牛蒡茶

2009-03-12T16:18:00.005+08:00

為左令乏味既水變成有味, 我耐不耐會買d唔同既茶放在櫃裡, 近期我買了牛蒡茶.

先睇睇佢既功效:

降火補腎天然健康食品。在本草備要中詳載其具有解熱、除風、利咽、止咳、治風濕、利尿、利便、除斑疹、治腰酸, 日本人奉為補腎壯陽聖品.

我飲係因為可以降血脂膽固醇, 仲可以解酒、去濕. 加上味道唔難飲, 當日常保健亦可. 只要將一小撮 (約6-7片) 放在保溫杯焗10分鐘即可. 因為牛蒡纖維豐富, 浸泡後可以連渣一齊食. 有些人亦會用紅蘿白+牛蒡煲湯, 不過我懶就不會了.

人蠢無藥醫

2009-03-12T14:10:00.004+08:00

之前我成日講既天王, 尋日又發生左件事. 天王出site 後返黎, 亞sir 問佢野, 突然亞sir 大嗌 :「你知唔知你o係邊間公司做? 出邊度糧??」全場即刻靜晒.......
呢刻大家好齊心咁樹起隻耳聽.......
根據上文下意, 我估應該係關收管理費事, A/C Dept. 推莊, 要我做既Dept. 出信通知番 A/C Dept.

又係低能喎...內部 dept. 通知都出memo呀, 出信.. 貼埋郵票寄好唔好??

其實亞sir真係好好脾氣, 不過佢有怨無路訴, 因為呢件極品係亞sir 親細佬個fd, 當初係撬佢返黎, 而家炒又唔炒得, 佢直情啖血由肺湧上黎再"good"番落去.

呢排5號仍又唔生性, 亞sir已經o鞋o鞋聲, 仲成鬼日激佢, 真係.....唉~

p.s. 天王黎左10個月, 5月就夠一年.

其實我post 出黎, 唔係想取笑佢, 只係而家d人既工作態度真係好有問題. 返左工10個月, 都無認真用個腦黎返工. 混混沌沌, 古惑又懶, 仲要擺款瀉博, 呢d咁既工作態度, 遲早俾人out呀!!

工作態度

2009-03-11T14:59:00.005+08:00

lunch time 時我去了攪股票轉倉手續, 在A銀行辦妥手續後, 怱怱忙忙又去獅子銀行辦手續, 入到去客戶服務櫃位, 當時有一男一女職員閒談, 我問:「請問股票轉倉o係邊層攪?」女職員答:「在這層攪得呀!」之後個男職員帶我坐低, 我眼看男職員應是大學畢業無耐初出社會做事. 因為.......

男: 咁快填晒呀!

自: 係A銀行既影印本.

之後男職員列印一份表格

男: 你知唔知A銀行既編號係幾多?

自: 唔知

男: 佢無俾你咩???

自: o下...無喎....跟著呆坐成5分鐘

男既不停打電話, 應該係想問個編號, 但無人聽, 此時已經1:50pm

自: 有無文件要簽, 我要返工, 我簽左俾你先.

男: 而家爭個A銀行編號....我要搵埋先......

自: o下...我要返工, 我簽左名, 你之後慢慢搵!

男既面色一沉. 好唔願意咁叫我簽名.....

我覺得真係好低能. 你搵唔到編號, 就要個客等搵到為止, 你無野呀???

我估..我一係阻住佢溝女, 一係佢就黎俾人裁.

心情、down、"笠"、不可思議

2009-03-09T10:35:00.005+08:00

經eric 提醒, 我好耐無野講, 亦比以前少上網, 原因係:

1. 之前要考試, 要溫書;

2. 呢排成日落雨, 連心情都好"笠";

3. 所謂心情down, 唔係股市問題, 係工作好無癮, 有一日直情上網搵工, 我想呢一年多既"零交流"生活我受夠呀(不過咁既時世點走呀!!);

4. 我至怕既 accout, 考試我果然balance 到......奇;

5. 之前話參加"健康跑", 尋日跑完呀! 估唔到(我加朋友共3個人)我係最快跑完o個個(5.5公里, 7個字);

6. 跑既時侯, 感覺好爽呀! (唔怪得d人話會減壓);

7. 我地仲走左去赤柱食"泗益", 之後又去左佐敦食"揸渣", 再行落去花園街食魚皮餃;

8. 返到家即刻昏迷.......

9. 隻腳好~痠~軟~

放心呀!! 雖然工作無癮, 但我目標為本, 又返緊學, 又時世唔好, 所以唔會發老皮唔撈既, 我講我只想發洩o下!

雪耳杏仁茶

2009-02-18T14:37:00.007+08:00

見3耳小姐耐不耐同大家介紹養生飲食, 等我又黎介紹o下近期既至愛.....雪耳杏仁茶.

中醫認為肺主皮毛，杏仁有止咳潤肺的功能，也有潤擇肌膚的效果。西醫研究也發現，杏仁含維他命Ｅ，可增加皮膚彈性。
雪耳潤肺，同時又滋陰養胃，益氣，肺氣虛和肺陰虛引致慢性咳嗽的人也非常適合。

以前我一d都唔鍾意杏仁, 近一兩年口味轉變, 果然覺得杏仁茶好香, 不過街上買既唔係太甜, 就是無杏仁味, 所以....自由又要出手自家製作 (呢d算唔算辛苦命?)

以下的份量可製作1,300毫升

材料: 大龍杏4兩、南北杏1兩、雪耳一個、冰糖或用糖冬瓜適量 (我就用糖冬瓜)

製法:

1. 大龍杏及南北杏用清水浸4小時, 之後隔水, 另雪耳用清水浸發;

2. 大龍杏及南北杏放入攪拌機加清水打碎; 再用豆漿袋隔渣, 搾出杏汁, 再把杏仁渣倒進攪拌機中加水1杯用高速打，同樣搾出杏汁;

3. 把搾出的杏汁及糖冬瓜放進煲內煮滾, 再加入已浸發雪耳, 煲20分鐘後熄火即成. (如果落冰糖, 要煲好最後先加)

註:

1. 大龍杏同南北杏最好去有信譽店舖買(e.g. 裕華) , 因1我試過貪方便在就近藥才舖買, 領左野, side 晒.

2. 記住磨完既杏仁渣, 千祈不要棄丟, 用黎沖涼磨身一流 (我連臉/頭髮都用, 之後敷在臉上, 隔一陣先沖), 試過你就知有幾正. 其餘的杏仁渣放在雪櫃, 可以keep 一星期)

3. 如果無時間"睇火" , 可以用豆漿機替代. (我都係用豆漿機煲)

出得黎行, 預左要還!!

2009-02-17T16:58:00.005+08:00

今年還債數目: 3底

2009-02-13T12:35:00.001+08:00

祝各位blog 友情人節快樂!!!

Sixteen Things About Me

2009-02-13T00:56:00.004+08:00

見牛太玩得咁開心, 悶悶o地, 又黎呀!!

規則：當你被別人TAG了的話，就必須寫一篇NOTE，其中要包含16項有關你的事情、習慣、喜好、目標，或任何各不相干但有關你的東西。然後，你需要另外TAG 16個人，當中包括將你TAG在他NOTE裡面的那個人。我TAG你是表示我想認識你更深。

1. 我在家中排行最細, 我有2個哥哥+1個家姐, 我同最近的哥哥相差10年。現在和爸爸+大哥同住.

2. 我相信我係一個貪靚既人, 不過外表點睇都唔似.

3.注重護膚, 深信要由內靚到外, 近年已盡量12時前訓. 夜蒲可免則免.

4. 喜歡訓覺, 晏覺一訓要3小時.

5.不喜歡星期日或假日行街shopping, 除非有目標.

6. 喜歡打邊爐, 唯獨唔多食肥牛.

5.大部分生果都會食, 除左人參果.

6.大部分菜式都食, 除左羊.

7. 體重曾經去到188磅, 現在已回落(最瘦時126磅, 即係而家唔止呢個數), 不過都係肥, 要努力減呀!!

8. 鍾意煮野, 但唔鍾意為煮而煮. (即係可以客串落廚, 唔可以日日煮), 最拿手是煲湯.

9. 鍾意行露天街市.

10. 鍾意戶外活動, 但唔可以長時間(8小時以上)揹大pack行, 膝頭會痛.

11. 曾經做過幼兒園教師、社福界....呢d都係我想做既, 總算試過了. 而家做緊o個份工將會踏入第八年. (定第九年呢?)

12. 喜歡小朋友, 但唔想自己生.

13. 無運動細胞, 尤其球類運動, 永遠對唔準目標.

14. 最不可思議: 學識游水.

15. 一年總會有一次旅行, 最高紀錄一年3短1長旅行.

16. 最遺憾的事: 子欲養而親不在.

各位blog 友, 因為太大篇, 唔想阻你地blog, 所以無tag, 有無興趣一齊玩呀????

傷心酸辣粉

2009-02-11T12:26:00.012+08:00

發完嗡風, 講番d醒神野先!

因為肩頸痛得好利害(由農曆年到現在), 尋晚我決定去西九龍中心按摩, 順便去試一間四川小店. 點知有意外驚喜:

店名叫"傷心酸辣粉", 一個小小黃色紅字的招牌 (直情係上海街o個隻款)吊在店外, 店子小小, 只有2張摺"木台"+街外2張, 店內只有3名店員, 其中一個仲係有不可一世feel, 我直覺亞叔咁寸, 食品款式又唔多, 應該係有d料到, 唔係點o係福榮街立足....

酸辣粉, 香港暫時無一碗可以同國內比, 可能要遷就香港人口味, 呢一碗對我來說真係ok, 唯一不足之處係唔夠酸辣, 所以下次再去我會越級挑戰....

因為見個個都食口水雞, 所以我都來一客先. 個汁好惹味, 好香.

因為係套餐關係, 酸辣粉+口水雞+椰汁盛惠$38

最遺憾係賣晒酸辣土豆絲!! 我好耐無食過呀!! 嗚嗚

傷心酸辣粉

地址 :
深水埗福榮街94號地下
電話 : 2720 8222

(照片來源: 開飯網)

飛出去~~

2009-02-10T15:52:00.006+08:00

突然, 好想好想飛出去!!

如果機會來臨, 我不會再次放過它,

我一定會好好把握,

就算失敗, 都對自己無悔!

至少...我嘗試過,

失敗對我來說, 是一種磨練、經歷,

我不會退縮的!!

黑!!!!

2009-02-09T10:43:00.003+08:00

繼上星期嬲到噴煙事件後, 黑氣今日又襲擊我呀!!
今早我如常去食早餐, 早餐既地點(在2樓), 呢座大廈其實係我亞sir 另一個office.
我一入lift, 企右邊個落, 之後關門!
突然有個環保袋fing 入黎, 之後隻死鬼(容許我一次種族岐視)入黎, 仲要啤行o個隻.
隻死鬼企左邊, 我又按掣關門, 佢突然按"open", 之後亞sir 就入lift.....
oh....精彩部份黎呀! 隻死鬼不停丙我, 內容話我唔睇人呀...關門呀......我無出聲!!!!
去到茶記, 亞sir 叫我一齊坐, 心諗...唉真黑....
亞sir 同我講隻鬼既內容(佢以為我聽唔明, 唔好傻呀, 俾人丙點會唔知, 所以我截住佢)
自:我知...佢話我........我企埋一邊, 真係睇唔到你地.....
亞sir: 係呀!! 不過成件事我都睇到.....唔駛理佢! 最緊要你唔係呢度d伙記...(分分鐘係口是心非)

其實...我覺得最"火羅"係亞sir睇晒咯. 話我唔睇人, 我企埋一邊點睇呀!! 用下腦呀...老外!!

啤啤氣

2009-02-06T14:49:00.005+08:00

估唔到一"立春", 就領野!

總之今日好慶, 慶到xyz#%#%&

所以我買左一盒韓國士多啤梨黎啤啤氣~~~

仲有,給在外地既3耳仔打氣~~

生日快樂!!

2009-02-03T09:49:00.009+08:00

昕昕....六歲生日快樂!!!

p.s. 家姐小女兒, 今年六歲, 9月升小一. 個性頑皮、好動、小氣! 深得父母寵愛!!

聚一聚

2009-01-31T12:49:00.005+08:00

舊同事A忽然話: 我想去九龍城食泰國菜, 順便見o下我.....

咁我當然無 Say No....

好...去片~

芒果冰 ~ 今次差o左..無乜芒果味

生蝦刺身~"正"! 連唔食生o野既A小姐都話要點

炸蝦餅-好得!!

其實仲有炒蜆(不過唔新鮮, 最後取消)同埋炒通菜, 不過自由部手機無電, 所以無相睇lu!

呢餐盛惠$236~~~

食完開年飯(以前一齊工作時我地會2條友食餐好d當開年), 希望大家事事順利!

今夕是何年

2009-01-31T10:48:00.004+08:00

另一近期喜愛作品!!

今夕是何年
曲:方大同　　詞:林若寧　　編:馮翰銘
湮遠朝代　用宋體繪畫月牙
無眠難忘舊愛　字體沾滿色彩
跨過年代　沒法子安頓下來
霓虹隨隨目送舊愛　又再被愛
短短悲哀　又以秒速分開
* 床前明月光　為何無月光
唐朝明月詩化了別緒
至今急速生活裡　難過的只有隨浪去
浮華時代追　如何能定居
大概所有愛情只不過換到一刻憔悴
流過市區　流進廢墟　化作亂絮 *
失去期待　像皺紙淺薄未來
悠長年華沒法盛載
又殺掉愛　戀戀花開
上世紀的悲哀
Repeat *
被細水推翻過去　情侶一一告退
誰沖得破時間荏苒歷劫不衰
滄海也被困在市集裡　深愛就如落霞泛潮水
夕照一過所愛不後退　紅霞淡化開去
床前明月光　為何無月光
唐朝明月詩化了別緒
至今急速生活裡　難過的只有隨浪去
浮華時代追　如何能定居
鬧市走過百萬人多少對活過一生情侶
流過市區　流進廢墟　化作亂絮
甜美似水　煩惱似水　化作年歲

京都之雪

2009-01-30T12:31:00.002+08:00

雖然佢有"鄧走音"之名, 但我又覺得呢首歌ok(除左佢既唱功)! 尤其當我在落雪既首爾.....

京都之雪 – 鄧麗欣

零度中細雪如塵
游盡古刹與園林
暮色中覓尋旅館的暗燈
迎面飄雪滿長袍
迷路中與你重逢
在掌心呵氣贈我溫度
怎答謝你仍然能待我這麼好
從前的爭吵跟紛擾不計數
沉默中如電影提著傘見證下秒的擁抱
望這晚細雪飄滿地
不想你與我再說分離
盼明晨太陽融冰千里
讓悲傷都一起化成蒸氣
**望這晚細雪飄滿地
吹不散再次融化一起 (天知道你我又再一起)
到月臺挽著你的手臂
讓好風光都記起缺憾不需銘記 (我如此深愛你)
神護寺四野無人寧靜洗潔了靈魂
讓鐘聲敲過願好景發生
一對伴侶同游迎大雪有幾許
如年長一起牽手追憶過去
純白色從夜空浮下你我變白髮的一對
望這晚細雪飄滿地
不想你與我再說分離盼明晨太陽融冰千里
讓悲傷都一起化成蒸氣**

財散人安樂!!

2009-01-29T16:21:00.011+08:00

首先多謝咁多位blogger在http://freefreewalker.blogspot.com/2009/01/blog-post_23.html俾面留言!!

做完幾日"名媛", 又要打回原形...變番騾仔!!

今次發生o左既事:

1. morning call 響o左再番訓.....唔知醒

2. 團友勁自私, 亦有團友拗柴

3. 一生人第一次買咁多甲油 (可我能前世係百足)

4. 發生疑似靈異事件 x 2

提早拜年!!

2009-01-23T17:07:00.000+08:00

返埋今日..收爐呀!!

各位 blog 友, 祝新一年事事順利, 心想事成!! 初三晚見!!

好擔心!!

2009-01-21T17:28:00.002+08:00

以下係我同舊同事A小姐 E-mail 內容:

A: 我唔悶呀，仲好high添~ 諗住會係呢度長做啦, 點知, 連probation 都過唔到, 我諗, 我都係無得留低架喇~

自: 下? 你過唔到probation?? 你講真定講假呀??

A: 我似揾d咁嘅野講笑咩, 我而家都唔知自己可以點~

自: 佢通知你過唔到試用期呀, 定係你諗呀?? 詳細d講o下~

A: 同我傾過, 話要extend 我嘅試用期2個月, 我仲唔謝哂, 仲要我詳細d講, 唔好玩啦, 已經超無mood 喇~

自: Extend 試用期?? 原因係~
唔好諗得咁灰!!!

A: 原因係我太多意見, 同我阿姐唔夾

自: 你不嬲都無意見, 點解你亞姐會咁講??

A: 因為有時我覺得咁樣做易d, 佢唔係, 我博過佢幾次, 佢咪就話過我囉~

自: Oic…..即係公報私仇??

A: 唔知呀, 呢d都係我嘅工作表演卦? 總之, 人到中年, 做咩都有問題, 我就好想揾個 "窿" 捐埋,等死咋~

自: 唉…..人算不如天算!!

祝A小姐大步檻過!!

繼續插呀!!

2009-01-21T16:55:00.003+08:00

事先聲明, 我無....開口丙架!

今日收到一張 invoice, 係蒸餾水公司寄來, 內容係要付$500按金, 我..打落 site 問R先生(大廈主管)
自: 你有無要多部水機?
R: 無
自: 有無欠人水樽未還?
R: 無....
自由跟住打去蒸餾水公司查詢, 點知CS 既姐姐話我同事取左5個膠箱, 所以要付$500按金.....
我為左攪清楚發生乜事, 唯有..哦...咁..我問清楚我同事先, 唔該晒!
之後.....
自: 你有無問蒸餾水公司取膠箱?
R: 有
自: 你知唔知要俾按金?
R: 知!
自: 有無人批你OK?
R: er.....er.....天王(主任仔).....
自: 你有無supporting 俾我? 我收到單, 要找數....點找呀??
R: 按金可以取番o麻 ! 我要搵天王..........

你估自己屋企叫水咩? 既然可以取番, 又唔見R先生你自己俾......

真係俾佢地吹到啤一聲!!

備註: 我同r先生唔多o岩, 佢門面功夫做足, 但內裡唔駛問梗係賤格呀!!
同埋成日自把自為!

come 唔come 撈??

2009-01-20T23:50:00.003+08:00

昨晚上堂既時侯, 有個同學仔交功課俾亞sir, 亞sir 諗住行過去接, 點知同學仔話:「唔駛...我親自行出黎交呀, 有誠意d o麻!」
亞sir之後就講, 「um....你一定come 撈! 」點解 ? 而家d後生, 老細行到埋位同佢講野, 佢仲坐o係度.... 如果上庭, 實俾老爺奶奶(法官)駡到飛起..........
再講番今日發生既事, 之前亞sir 在 tenant handbook 上發現d資料唔update, 用手塗改及加簽。亞sir 就寸天王:「嘩! 你咁都出得街? 咁核突........下刪百多字」
亞sir 要求再打。但又唔係叫我打, 叫佢自己打。我知肥婆(亞姐)係有 copy, 但唔俾佢。
今日天王叫我打, 但我發現...佢應承亞sir update 資料, 但無做 la. 最離譜係個電話號碼係舊既。
我同天王講: 「我打左2頁, d資料好似有問題, 你不如睇睇先, 我至打!」
佢3分鍾唔夠俾番我, 仲同我講: 「睇完」! 之後仲問我, 點解唔打左先, 到時再改??

我心諗, 既然你知道係錯, 點解又唔改左先打呢?? 做一份文件, 但要用雙倍時間值得咩??
之後我腦海就想起昨晚既片段.....

備註: 亞sir---Senior Manager(第二把膠倚)
天王--- 主任仔
肥婆亞姐---高級主任
自由行---打雜亞四 (主要服待亞sir, 但都要湊埋2個主任, 一個工程師, 仲有一大堆前線同事)

是你....帶給我喜樂的人生

2009-01-20T11:20:00.000+08:00

是你...帶給我喜樂的人生!!

又敗家

2009-01-19T14:39:00.003+08:00

抱著人一世, 物一世既原因, 所以我又敗家呀!! 一次咁多呀!!!

又真係....一分錢一分貨喎!!!

大掃除

2009-01-19T14:31:00.004+08:00

因為book 唔切家務助理既關係, 所以今年大掃除既工作要由我親自操刀,

大掃除後換來一身痠痛!!

2005年o既我

2009-01-16T17:09:00.009+08:00

自從在 blog友處 dl slide 之後, 今日不停dl 舊相, 嘩...05年既我原來......kakaka~

開估呀! 我kakaka 係因為....嘩..乜以前瘦咁多~~

減肥第一炮

2009-01-14T16:27:00.007+08:00

減肥減肥減肥.......

為o左迫自己郁動o下, 我報名參加3月8日"健康跑", 雖然只係跑5.5公里, 但對於一個擁有加菲貓身形既我黎講...就有d難度。不過50蚊報名費+全數撥捐有機資源中心, 咁..死就死呀!! hehe~

特別鳴謝: 俾我"昆"o左落搭既kaka 同大口狗!!

好味jelly

2009-01-14T16:16:00.003+08:00

好肉痛, 但....好好味!!! ^^

曲奇餅

2009-01-14T15:11:00.005+08:00

由細至大, 我都喜愛曲奇餅,愛它的香, 愛它的脆! 聖誕節又忍唔住買一罐.......好味呀!

不過為左減肥, 我o地要暫時分手先!!

搬家

2009-01-10T10:37:00.001+08:00

原來我來o左 blogspot 不經不覺有5個月了. 記得5個月前, 抱住八卦既心態, 入左去師傳個blog 度睇, 點知......亞呢個又幾過癮、 o個個又幾好笑...... 好似好好玩喎!
之後就試下留言. 又得意喎..d人真係回覆我, 仲好鬼精景. 開始覺得其實玩blog 唔係d人所講好危險、好差..... .
或者工作既沉悶, 又或者白羊座既人喜歡活在自己既世界, 我終於開始寫blog. 將一d 現實生活中我未必會講既野在blog上發表. 原來都係一種心情宣洩. 有時blog 友既一句鼓勵, 真係好窩心架。
仲有最最最開心係在blog 度識到一班好玩既blog友, 成個大家庭咁, 雖然有部份未見過, 但日日都有傾談, 有時你鼓勵我, 有時我勉勵你, 真係好似一家人。
最後....促成我今次決心搬家既幕後功臣........卡卡, 我真係要多謝你份厚禮!
唔得你將會送09年最香艷既禮物俾我作為我新屋入伙之喜, 我諗我到2010年都未的起心肝郁手呀!
你冒著寒風, 捨己為人既精神, 令到我地一班 blog 界女仕在10度既早上血壓上升、心跳加速、手心冒汗, 我真係要向代全blogspot 既女仕向你至敬!!